ಸಂಕಲ್ಪ ಗೀತೆ
ಅಭ್ಯಾಸ (ಪ್ರಶೋತ್ತರಗಳು)
ಅ) ಕೊಟ್ಟಿರುವ ಪ್ರಶ್ನೆಗಳಿಗೆ ಒಂದೊಂದು ವಾಕ್ಯದಲ್ಲಿ ಉತ್ತರಿಸಿ:
1. ಯಾವುದನ್ನು ಎಚ್ಚರದಲಿ ಮುನ್ನಡೆಸಬೇಕು?
ಉತ್ತರ:- ಬಿರುಗಾಳಿಗೆ ಹೊಯ್ದಾಡುವ ಹಡಗನ್ನು ಎಚ್ಚರದಿಂದ ಮುನ್ನಡೆಸಬೇಕು.
2. ನದೀಜಲಗಳು ಏನಾಗಿವೆ?
ಉತ್ತರ:- ನದೀಜಲಗಳು ಕಲುಷಿತವಾಗಿವೆ.
3. ಯಾವುದಕ್ಕೆ ಮುಂಗಾರಿನ ಮಳೆಯಾಗಬೇಕು?
ಉತ್ತರ:- ಕಲುಷಿತವಾದ ಈ ನದೀಜಲಗಳಿಗೆ ಮುಂಗಾರಿನ ಮಳೆಯಾಗಬೇಕು.
4. ಕಾಡುಮೇಡುಗಳ ಸ್ಥಿತಿ ಹೇಗಿದೆ?
ಉತ್ತರ:- ಕಾಡುಮೇಡುಗಳು ಬರಡಾಗಿವೆ.
5. ಯಾವ ಎಚ್ಚರದೊಳು ಬದುಕಬೇಕಿದೆ?
ಉತ್ತರ:- ಮತಗಳೆಲ್ಲವೂ ಪಥಗಳು ಎನ್ನುವ ಹೊಸ ಎಚ್ಚರದೊಳು ಬದುಕಬೇಕಾಗಿದೆ.
ಆ) ಕೊಟ್ಟಿರುವ ಪ್ರಶ್ನೆಗಳಿಗೆ ಎರಡು–ಮೂರು ವಾಕ್ಯಗಳಲ್ಲಿ ಉತ್ತರಗಳನ್ನು ಬರೆಯಿರಿ:
1. ಹಡಗನ್ನು ಯಾವುದರ ಬೆಳಕಿನಲ್ಲಿ ಮುನ್ನಡೆಸಬೇಕಿದೆ?
ಉತ್ತರ:- ಸುತ್ತಲು ಕವಿಯುತ್ತಿರುವ ಕತ್ತಲೆಯೊಳಗೆ ಪ್ರೀತಿಯ ಹಣತೆಯನ್ನು ಹಚ್ಚಿ ಅದರ ಬೆಳಕಿನಲ್ಲಿ ಬಿರುಗಾಳಿಗೆ ಹೊಯ್ದಾಡುತ್ತಿರುವ ಹಡಗನ್ನು ಎಚ್ಚರದಿಂದ ನಡೆಸಬೇಕಿದೆ.
2. ಕಾಡುಗಳಿಗೆ ಹೇಗೆ ಮುಟ್ಟಬೇಕಿದೆ?
ಉತ್ತರ:- ಕಲುಷಿತವಾಗುತ್ತಿರುವಂತಹ ನದೀಜಲಗಳಿಗೆ ಮುಂಗಾರಿನ ಮಳೆಯಾಗಿ ಬರಡಾಗಿರುವಂತಹ ಈ ಕಾಡುಮೇಡುಗಳಿಗೆ ಸಮೃದ್ಧಿಯ ವಸಂತವಾಗಬೇಕಾಗಿದೆ.
3. ಹೊಸ ಭರವಸೆಗಳನ್ನು ಮೂಡಿಸಿ ಯಾವುದರ ನಡುವೆ ಸೇತುವೆಯಾಗಬೇಕಿದೆ?
ಉತ್ತರ:- ಬಿದ್ದುದನ್ನು ಮೇಲಕ್ಕೆ ಎಬ್ಬಿಸಿ ಅಂದರೆ ಕೆಳಗೆ ಬಿದ್ದವರನ್ನು ಆಶಾಕಿರಣಗಳ ಮೂಲಕ ಮೇಲಕ್ಕೆತ್ತಿ ಮನುಜರ ನಡುವಿನ ಅಡ್ಡಗೋಡೆಗಳನ್ನು ಕೆಡುವುತ್ತ ಸೇತುವೆಗಳಾಗೋಣ.
4. ನಾಳಿನ ಕನಸನ್ನು ಬಿತ್ತಬೇಕಾದರೆ ನಾವು ಹೇಗೆ ಬದುಕ ಬೇಕು?
ಉತ್ತರ:- ಮತಗಳೆಲ್ಲವೂ ಪಥಗಳು ಎನ್ನುವಂತಹ ಹೊಸ ಎಚ್ಚರದಲ್ಲಿ ನಾವು ಬದುಕಬೇಕು. ಭಯ ಸಂಶಯದಲ್ಲಿ ಕಂದಿರುವಂತಹ ಕಣ್ಣಿನಲ್ಲಿ ನಾಳಿನ ಕನಸನ್ನು ಬಿತ್ತೋಣ.
ಇ) ಕೊಟ್ಟಿರುವ ಪ್ರಶ್ನೆಗಳಿಗೆ ಎಂಟು–ಹತ್ತು ವಾಕ್ಯಗಳಲ್ಲಿ ಉತ್ತರಿಸಿ:
1. ನಾವು ಯಾವ ಸಂಕಲ್ಪ ಕೈಗೊಳ್ಳಬೇಕೆಂಬುದು ಕವಿ ಶಿವರುದ್ರಪ್ಪ ನವರ ಆಶಯ?
ಉತ್ತರ:- ಇದು ಸಂಕಲ್ಪ ಯುಗವಾಗಿದೆ. ಸ್ವಾತಂತ್ರ್ಯ ಉದಯದ ಮತ್ತು ಪೂರ್ವದ ಕಾಲದಲ್ಲಿ ಯುಗಪುರುಷರು ಅನೇಕ ಸತ್‌ಸಂಕಲ್ಪಗಳನ್ನು ಮಾಡಿಕೊಂಡಿದ್ದರು. ಸ್ವಾತಂತ್ರವೇ ನನ್ನ ಜನ್ಮಸಿದ್ದ ಹಕ್ಕು. ಅದನ್ನು ನಾವು ಸಾಧಿಸದೆ ಬಿಡಲಾರೆನು ಎಂದು ಒಬ್ಬರ ಸಂಕಲ್ಪವಾದರೆ, ಚಲೇಜಾವ್ ಎನ್ನುವುದು ಇನ್ನೊಬ್ಬರು ಬ್ರಿಟಿಷರ ವಿರುದ್ಧ ಘೋಷಣೆ ಕೂಗಿ ಸ್ವಾತಂತ್ರ್ಯವನ್ನು ಪಡೆಯುವ ಸಂಕಲ್ಪ ಮಾಡಿದರು. ಅದನ್ನು ಅವರು ಸಾಧಿಸಿಯೂ ಬಿಟ್ಟರು.
ಅದರಂತೆ ಪ್ರಸ್ತುತದ ಸಂಕಲ್ಪ ಗೀತೆಯಲ್ಲಿಯೂ ರಾಷ್ಟ್ರಕವಿ ಜಿ.ಎಸ್. ಶಿವರುದ್ರಪ್ಪನವರೂ ಅಜ್ಞಾನವನ್ನು ತೊಡೆದು ಹಾಕುವ ಅಲ್ಲಿ ಪ್ರೀತಿಯ ಹಣತೆಯನ್ನು ಬೆಳಗಿಸುವ ಜೀವನದಲ್ಲಿನ ದುಃಖವೆಂಬ ಬಿರುಗಾಳಿಗೆ ಸಿಲುಕಿ ಹೊಯ್ದಾಡುವ ಹಡಗನ್ನು ಎಚ್ಚರದಿಂದ ನಡೆಸುವ ಸತ್ಸಂಕಲ್ಪ ಮಾಡಿದ್ದಾರೆ.
2. ಸಂಕಲ್ಪ ಮತ್ತು ಅನುಷ್ಠಾನದ ಕುರಿತು ಕವಿ ಶಿವರುದ್ರಪ್ಪನವರ ಅಭಿಪ್ರಾಯವನ್ನು ವಿವರಿಸಿ.
ಉತ್ತರ:- ಜಗತ್ತಿನಲ್ಲಿ ಯಾವ ಮನುಷ್ಯನೇ ಆಗಿರಲಿ, ಸ್ತ್ರೀಯಾಗಿರಲಿ ಪುರುಷನಾಗಿರಲಿ ಒಂದು ಪ್ರತಿಜ್ಞೆ ಅಥವಾ ಸಂಕಲ್ಪವನ್ನು ಮಾಡಬೇಕು. ಆದರೆ ಅದನ್ನು ಅನುಷ್ಠಾನದಲ್ಲಿ ತಂದಾಗ ಮಾತ್ರ ಆ ಸಂಕಲ್ಪಕ್ಕೆ ಒಂದು ಬೆಲೆ ಇದೆ. ಒಂದು ಅರ್ಥವಿದೆ. ಇಂದು ಭಾರತದ ಜೀವನಾಡಿಗಳೆನಿಸಿದ ನದಿಗಳೆಲ್ಲಾ ಕಲುಷಿತ ಜಲದಿಂದ ತುಂಬಿ ಹೋಗಿವೆ. ಆ ಕಲುಷಿತ ಜಲಕ್ಕೆ ಮುಂಗಾರಿನ ಮಳೆ ಆಗಿ ಅಲ್ಲಿ ಹೊಸ ನೀರು ಪ್ರವಹಿಸುವಂತೆ ಪ್ರತಿಜ್ಞೆ ಮಾಡೋಣ. ಬರಡಾಗಿರುವಂತಹ ಕಾಡು ಮೇಡುಗಳನ್ನು ಸಮೃದ್ಧಿಯಾಗುವಂತೆ ಮಾಡೋಣ, ಸಮಾಜದಲ್ಲಿ ಯಾರು ಬಿದ್ದವರಾಗಿರುವರೋ ಅವರಲ್ಲಿ ಆತ್ಮಸ್ಥೆರ್ಯವನ್ನು ತುಂಬಿ ನಮ್ಮ ನಮ್ಮ ನಡುವೆ ಇರುವಂತಹ ವೈಷಮ್ಯದ ಅಡ್ಡಗೋಡೆ ಗಳನ್ನು ಕೆಡವಿ ಸ್ನೇಹದ ಸೇತುವೆಯನ್ನು ಕಟ್ಟೋಣ. ಮತ ಮತಗಳಲ್ಲಿನ ಮೌಡ್ಯಗಳನ್ನು ತೊಡೆದು ಹಾಕಿ ನಾಳಿನ ಕನಸನ್ನು ಬಿತ್ತೋಣ ಎಂಬುದು ಶಿವರುದ್ರಪ್ಪನವರ ಆಶಯವಾಗಿದೆ.
ಈ) ಸಂದರ್ಭಸಹಿತ ಸ್ವಾರಸ್ಯವನ್ನು ವಿವರಿಸಿ:
1. “ಪ್ರೀತಿಯ ಹಣತೆಯ ಹಟ್ಟೋಣ“
ಉತ್ತರ:- ಕಾವ್ಯಭಾಗ : ಸಂಕಲ್ಪಗೀತೆ
ಕವಿ : ರಾಷ್ಟ್ರಕವಿ ಜಿ.ಎಸ್. ಶಿವರುದ್ರಪ್ಪ
ಆಕರ : ಎದೆತುಂಬಿ ಹಾಡಿದೆನು ಕವನ ಸಂಕಲನ.
ವಿವರಣೆ: ಪ್ರಸ್ತುತ ವಾಕ್ಯವನ್ನು ರಾಷ್ಟ್ರಕವಿ ಜಿ. ಎಸ್. ಶಿವರುದ್ರಪ್ಪ ನವರು ಬರೆದ ಸಂಕಲ್ಪ ಗೀತೆ ಎಂಬ ಕವಿತೆಯಿಂದ ಆಯ್ಕೆ ಮಾಡಲಾಗಿದೆ.
ಇಂದು ನಮ್ಮ ಸುತ್ತಮುತ್ತ ಎಲ್ಲ ಕಡೆಗೂ ಅಜ್ಞಾನದ ಕತ್ತಲೆಯೇ ತುಂಬಿದೆ. “ತಮಸೋಮಾ ಜ್ಯೋತಿರ್ಗಮಯ” ಋಷಿ ಮುನಿಗಳು ಹಾಡಿದಂತೆ ನಾವು ಇಂದು ಈ ಕತ್ತಲೆಯನ್ನು ಆಮೂಲಾಗ್ರವಾಗಿ ಅಳಿಸಿ ಹಾಕಿ ಅದರ ಸ್ಥಾನದಲ್ಲಿ ಒಂದು ಪ್ರೀತಿಯ ಹಣತೆಯನ್ನು ಹಚ್ಚೋಣ ಎನ್ನುತ್ತಾರೆ ಡಾ. ಜಿ.ಎಸ್. ಶಿವರುದ್ರಪ್ಪ.
2. “ಮುಂಗಾರಿನ ಮಳೆಯಾಗೋಣ”
ಉತ್ತರ:- ಕಾವ್ಯಭಾಗ : ಸಂಕಲ್ಪಗೀತೆ
ಕವಿ : ರಾಷ್ಟ್ರಕವಿ ಜಿ.ಎಸ್. ಶಿವರುದ್ರಪ್ಪ
ಆಕರ : ಎದೆತುಂಬಿ ಹಾಡಿದೆನು ಕವನ ಸಂಕಲನ.
ವಿವರಣೆ: ಪ್ರಸ್ತುತ ವಾಕ್ಯವನ್ನು ರಾಷ್ಟ್ರಕವಿ ಜಿ. ಎಸ್. ಶಿವರುದ್ರಪ್ಪ ನವರು ಬರೆದ ಸಂಕಲ್ಪ ಗೀತೆ ಎಂಬ ಕವಿತೆಯಿಂದ ಆಯ್ಕೆ ಮಾಡಲಾಗಿದೆ.
ಹಲವಾರು ಕಾರಣಗಳಿಂದ ಇಂದು ಭಾರತದಲ್ಲಿನ ನದಿಗಳೆಲ್ಲವೂ ದುರ್ಗಂಧದಿಂದ ಕೂಡಿ ಜಲಮಾಲಿನ್ಯವನ್ನು ಹೊಂದಿದೆ. ಮನು ಕುಲದ ಜೀವನಾಡಿ ಎಂದರೆ ಜಲ. ಅದರ ಪಾವಿತ್ರತೆಯನ್ನು ನಾವು ಇಂದು ಕಾಪಾಡಿಕೊಂಡು ಬರಲು ಮುಂಗಾರಿನ ಮಳೆಯಾಗಿ ಒಡಲಾಳದ ವಿಸ್ತಾರದಿಂದ ಹರಿದು ಶುದ್ದವಾಗಿಸೋಣ.
3. “ಹೊಸ ಭರವಸೆಗಳ ಕಟ್ಟೋಣ“
ಉತ್ತರ:- ಕಾವ್ಯಭಾಗ : ಸಂಕಲ್ಪಗೀತೆ
ಕವಿ : ರಾಷ್ಟ್ರಕವಿ ಜಿ.ಎಸ್. ಶಿವರುದ್ರಪ್ಪ
ಆಕರ : ಎದೆತುಂಬಿ ಹಾಡಿದೆನು ಕವನ ಸಂಕಲನ.
ವಿವರಣೆ: ಪ್ರಸ್ತುತ ವಾಕ್ಯವನ್ನು ರಾಷ್ಟ್ರಕವಿ ಜಿ. ಎಸ್. ಶಿವರುದ್ರಪ್ಪ ನವರು ಬರೆದ ಸಂಕಲ್ಪ ಗೀತೆ ಎಂಬ ಕವಿತೆಯಿಂದ ಆಯ್ಕೆ ಮಾಡಲಾಗಿದೆ.
ನನ್ನಷ್ಟಕ್ಕೆ ನಾನು ದೊಡ್ಡವನಾಗುವದು. ಜಗತ್ತಿನಲ್ಲಿ ಶ್ರೀಮಂತನೆನಿಸಿಕೊಳ್ಳುವುದೇನು ಮಹತ್ವದ್ದಲ್ಲ. ಆದರೆ ದುರ್ದೈವ ದಿಂದಾಗಿ ನಮ್ಮವರೇ ಅವನತಿ ಹೊಂದಿ ಅತ್ಯಂತ ಕಠಿಣತರವಾದ ಪರಿಸ್ಥಿತಿಯಲ್ಲಿ ಇರುವಾಗ ಅವರನ್ನು ಮೇಲಕ್ಕೆ ಎಬ್ಬಿಸಿ ಪರಸ್ಪರರಲ್ಲಿ ಉಂಟಾಗಿರುವಂತಹ ವೈಷಮ್ಯಗಳನ್ನು ತೊರೆದು ಹಾಕೋಣ. ನಾವಿಲ್ಲಿಗೆ ಜನಿಸಿ ಬಂದಿರುವುದು ದ್ವೇಷಿಸಲಿಕ್ಕಲ್ಲ. ಪ್ರೀತಿಸಲಿಕ್ಕೆ ಎಂಬ ಅರಿವು ಮೊದಲು ಇರಬೇಕು.
4. “ಹೊಸ ಎಚ್ಚರದೊಳು ಬದುಕೋಣ“
ಉತ್ತರ:- ಕಾವ್ಯಭಾಗ : ಸಂಕಲ್ಪಗೀತೆ
ಕವಿ : ರಾಷ್ಟ್ರಕವಿ ಜಿ.ಎಸ್. ಶಿವರುದ್ರಪ್ಪ
ಆಕರ : ಎದೆತುಂಬಿ ಹಾಡಿದೆನು ಕವನ ಸಂಕಲನ.
ವಿವರಣೆ: ಪ್ರಸ್ತುತ ವಾಕ್ಯವನ್ನು ರಾಷ್ಟ್ರಕವಿ ಜಿ. ಎಸ್. ಶಿವರುದ್ರಪ್ಪ ನವರು ಬರೆದ ಸಂಕಲ್ಪ ಗೀತೆ ಎಂಬ ಕವಿತೆಯಿಂದ ಆಯ್ಕೆ ಮಾಡಲಾಗಿದೆ.
ನಾವುಗಳು ಇಂದು ಸಮಾಜದಲ್ಲಿ ಸರ್ವ ಸಮಾನತೆ ಯನ್ನು ತರಬೇಕಾಗಿದೆ. ಅದಕ್ಕಾಗಿ ಆರ್ಥಿಕವಾಗಿ, ಜಾತಿವಾದ ದಿಂದಾಗಿ ಕೆಳಗೆ ತುಳಿಯಲ್ಪಟ್ಟವರನ್ನು ಮೇಲೆತ್ತಬೇಕಾಗಿದೆ. ಮನುಷ್ಯ ಮನುಷ್ಯರ ನಡುವೆ ಇರುವಂತಹ ವೈಷಮ್ಯದ ಗೋಡೆಯನ್ನು ಕೆಡವಿ ಸೇತುವೆ ಆಗಬೇಕಾಗಿದೆ. ಮತಗಳೆಲ್ಲವೂ ಒಂದೊಂದು ಪಥಗಳು ಎನ್ನುವ ಹೊಸ ಎಚ್ಚರದಲ್ಲಿ ಬಾಳೋಣ. ಅಂದಾಗಲೇ ಭಾರತವು, ಮನುಕುಲವು ಉದ್ದಾರವಾಗಬಲ್ಲದು ಎಂಬುದು ಕವಿಯ ಮತವಾಗಿದೆ.
ಉ) ಬಿಟ್ಟ ಜಾಗಗಳನ್ನು ಸೂಕ್ತ ಪದದಿಂದ ತುಂಬಿ:
1. ಸಂಕಲ್ಪಗೀತೆ ಪದ್ಯವನ್ನು ಆರಿಸಿಕೊಳ್ಳಲಾಗಿದೆ————————ಕವನ ಸಂಕಲನದಿಂದ
ಉತ್ತರ:- ಎದೆತುಂಬಿ ಹಾಡಿದೆನು
2. ಕತ್ತಲೆಯೊಳಗೆ ಪ್ರೀತಿಯ …………………………. ಹಚ್ಚೋಣ.
ಉತ್ತರ:- ಹಣತೆಯ
3: ಜಿ.ಎಸ್. ಶಿವರುದ್ರಪ್ಪನವರು ……………ರಲ್ಲಿ ಸಮಾವೇಶ ಗೊಂಡ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನಾಧ್ಯಕ್ಷರಾಗಿದ್ದರು.
ಉತ್ತರ:- 1992
ಭಾಷಾ ಚಟುವಟಿಕೆ
1. ಕೊಟ್ಟಿರುವ ಪದ್ಯಭಾಗವನ್ನು ಪೂರ್ಣಗೊಳಿಸಿ ಕಂಠಪಾಠ ಮಾಡಿ.
ಅ) ಕಲುಷಿತವಾದೀ …………………………………….
…………………………………………………ಮುಟ್ಟೋಣ.
ಉತ್ತರ:- ಕಲುಷಿತವಾದೀ ನದಿಜಲಗಳಿಗೆ
ಮುಂಗಾರಿನ ಮಳೆಯಾಗೋಣ
ಬರಡಾಗಿರುವೀ ಕಾಡುಮೇಡುಗಳ
ವಸಂತವಾಗುತ ಮುಟ್ಟೋಣ.
ಆ) ಮತಗಳೆಲ್ಲವೂ………………………………
…………………………………ಬಿತ್ತೋಣ.
ಉತ್ತರ:- ಮತಗಳೆಲ್ಲವೂ ಪಥಗಳು ಎನ್ನುವ
ಹೊಸ ಎಚ್ಚರದೊಳು ಬದುಕೋಣ
ಭಯ ಸಂಶಯದೊಳು ಕಂದಿದ ಕಣ್ಣೂಳು
ನಾಳಿನ ಕನಸನು ಬಿತ್ತೋಣ.
2. ಕೊಟ್ಟಿರುವ ಪದಗಳ ಧಾತುಗಳನ್ನು ಗುರುತಿಸಿ ಬರೆಯಿರಿ:
ನಿಲ್ಲಿಸು, ನಡೆಸು, ಹಚ್ಚುವದು, ಮುಟ್ಟೋಣ, ಕಟ್ಟುವುದು, ಆಗೋಣ.
ಉತ್ತರ:-
ನಿಲ್ಲಿಸು–ನಿಲ್ಲು,
ಮುಟ್ಟೋಣ–ಮುಟ್ಟು,
ನಡೆಸು–ನಡೆ,
ಕಟ್ಟುವುದು–ಕಟ್ಟು,
ಹಚ್ಚುವುದು–ಹಚ್ಚು.
ಆಗೋಣ- ಆಗು
3. ಕೊಟ್ಟಿರುವ ಪದಗಳಲ್ಲಿರುವ ವಿಭಕ್ತಿ ಪ್ರತ್ಯಯಗಳನ್ನು ಪ್ರತ್ಯೇಕಿಸಿ ಬರೆಯಿರಿ:
ಪ್ರೀತಿಯ, ಬಿರುಗಾಳಿಗೆ, ಜಲಕ್ಕೆ ಬಿದ್ದುದನ್ನು, ಭರವಸೆಗಳ
ಉತ್ತರ:-
ಪ್ರೀತಿ+ಅ=ಪ್ರೀತಿಯ, ಷಷ್ಠಿ ವಿಭಕ್ತಿ
ಬಿರುಗಾಳಿ+ಗೆ=ಬಿರುಗಾಳಿಗೆ ಚತುರ್ಥಿ ವಿಭಕ್ತಿ
ಜಲ+ಕ್ಕೆ=ಜಲಕ್ಕೆ ಚತುರ್ಥಿ ವಿಭಕ್ತಿ
ಬಿದ್ದುದು+ಅನ್ನು=ಬಿದ್ದುದನ್ನು ದ್ವಿತೀಯಾ ವಿಭಕ್ತಿ
ಭರವಸೆಗಳ್+ಅ=ಭರವಸೆಗಳ ಷಷ್ಠಿ ವಿಭಕ್ತಿ.
4. ಕೊಟ್ಟಿರುವ ಪದಗಳಲ್ಲಿರುವ ವಿಭಕ್ತಿಯನ್ನು ಹೆಸರಿಸಿ.
ಸಂಶಯದೊಳ್, ಜಲದಿಂ, ಮರದತ್ತಣಿಂ, ರಾಯಂಗೆ
ಉತ್ತರ:-
ಸಂಶಯ –ಒಳ= ಸಪ್ತಮಿ ವಿಭಕ್ತಿ
ಜಲ-ಇಂ=ತೃತೀಯಾ ವಿಭಕ್ತಿ
ಮರದ –ಅತ್ತಣಿಂ= ಪಂಚಮಿ ವಿಭಕ್ತಿ
ರಾಯ -ಗೆ=ಚತುರ್ಥಿ ವಿಭಕ್ತಿ
5. ಕೊಟ್ಟಿರುವ ಧಾತುಗಳಿಗೆ ವಿದ್ಯರ್ಥಕ, ನಿಷೇಧಾರ್ಥಕ, ಸಂಭಾವನಾರ್ಥಕ ರೂಪಗಳನ್ನು ಬರೆಯಿರಿ.
ಹಾಡು, ನೋಡು, ಕಟ್ಟು, ಕೇಳು, ಓಡು, ಓದು, ಬರೆ.
ಉತ್ತರ:-
ಹಾಡು –ವಿದ್ಯರ್ಥಕ = ಹಾಡಲಿ.
ನೋಡು –ವಿದ್ಯರ್ಥಕ =ನೋಡಲಿ
ಕಟ್ಟು –ವಿದ್ಯರ್ಥಕ =ಕಟ್ಟಲಿ
ಕೇಳು –ವಿದ್ಯರ್ಥಕ = ಕೇಳಲಿ
ಓಡು –ವಿದ್ಯರ್ಥಕ = ಓಡಲಿ
ಓದು –ವಿದ್ಯರ್ಥಕ = ಓಡಲಿ
ಬರೆ- ವಿದ್ಯರ್ಥಕ = ಬರೆಯಲಿ.
ಹಾಡು –ನಿಷೇಧಾರ್ಥಕ = ಹಾಡದಿರಲಿ
ನೋಡು–ನಿಷೇಧಾರ್ಥಕ = ನೋಡದಿರಲಿ
ಕಟ್ಟು – ನಿಷೇಧಾರ್ಥಕ = ಕಟ್ಟದಿರಲಿ
ಕೇಳು- ನಿಷೇಧಾರ್ಥಕ = ಕೇಳದಿರಲಿ –
ಓಡು – ನಿಷೇಧಾರ್ಥಕ ಓಡದಿರಲಿ =
ಓದು –ನಿಷೇಧಾರ್ಥಕ = ಓದದಿರಲಿ
ಬರೆ – ನಿಷೇಧಾರ್ಥಕ = ಬರೆಯದಿರಲಿ
ಹಾಡು–ಸಂಭವನಾರ್ಥಕ = ಹಾಡಿಯಾನು
ನೋಡು–ಸಂಭವನಾರ್ಥಕ = ನೋಡಿಯಾನು
ಕಟ್ಟು – ಸಂಭವನಾರ್ಥಕ = ಕಟ್ಟಿಯಾನು
ಕೇಳು–ಸಂಭವನಾರ್ಥಕ = ಕೇಳಿಯಾನು
ಓಡು–ಸಂಭವನಾರ್ಥಕ = ಓಡಿಯಾನು
ಓದು–ಸಂಭವನಾರ್ಥಕ = ಓದಿಯಾನು
ಬರೆ–ಸಂಭವನಾರ್ಥಕ = ಬರೆದಾನು.